काठमाडौं । नेपालमा कोरोना संक्रमित शुन्य दुई वटा जिल्ला मात्र रहेको छ । स्वास्थ्य मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले नेपालका २ जिल्लामा कोरोना संक्रमित शुन्य रहेको बताएका हुन् ।

हाल मनाङ र मुुगु जिल्लामा एक जना पनि संक्रिय संक्रमित छैनन् । पछिल्लो २४ घन्टामा नेपालमा थप १ हजार ७ सय ९० जनामा कोरोना भाइरसको संक्रमण देखिएको छ । यो सहित नेपालमा कोरोना संक्रमित हुनेको संख्या २ लाख २४ हजार ७८ जना पुगेको छ ।

पछिल्लो २४ घन्टामा थप २ हजार ७ सय ९१ जना कोरोना संक्रमणमुक्त भएका छन् । योसहित नेपालमा हालसम्म २ लाख ४ हजार ८ सय ५८ जना उपचारपछि निको भएका छन् ।

त्यस्तै, नेपालमा एकै दिन थप २४ जना कोरोना संक्रमितको ज्यान गएको छ । योसँगै नेपालमा कोरोना संक्रमित मृतकको संख्या १ हजार ३ सय ६१ पुगेको छ । १७ हजार ८ सय ५९ जना आइसोलेसनमा रहेका छन् ।