एजेन्सी । कोरोना भाइरसबाट हुने मृत्युको विषयमा नयाँ र खतरनाक खुलासा भएको छ । कोरोना भाइरसबाट संक्रमित भइसकेका बिरामीहरुको हृदयाघातबाट ज्यान जाने खतरा धेरै हुन्छ । यो खुलासा स्वेडेनका वैज्ञानिकहरुले गरेका हुन् ।

शोधका अनुसार कोरोना संक्रमित भइसकेपछि हृदयाघातबाट ज्यान जाने खतरा महिलाहरुमा बढी हुन्छ । शोधकर्ताहरुका अनुसार कोरोना संक्रमित महिलाहरुलाई हृदयाघात भएको अवस्थामा उनीहरुको ज्यान जाने जोखिम ९ गुणा बढी भएको पाइएको छ ।

युरोपियन हर्ट जर्नलमा प्रकाशित शोधपत्रका अनुसार यो शोधमा १ हजार ९ सय ४६ कोरोना बिरामीको जाँच गरिएको थियो जसलाई कोरोना निको भएपछि अस्पताल बाहिर हृदयाघात भएको थियो । यस्तै अस्पतालमा रहँदा कोरोना संक्रमित भएका १ हजार ८० बिरामीहरुको पनि अध्ययन गरिएको थियो ।

यो अध्ययन गत वर्षको १ जनवरीदेखि जुलाइसम्मको हो । स्वेडेनको युनिभर्सिटी अफ गोथेनबर्गका अनुसार यो अध्ययन त्यो समयमा गरिएको थियो जतिबेला कोरोना भाइरस पीक अवस्थामा थियो ।

अध्ययनका अनुसार जुन बिरामी कोरोना निको भएर अस्पतालबाट घर गएका थिए उनीहरुको हृदयाघातबाट ज्यान जाने संख्यामा ३/४ गुणा वृद्धि भयो । अर्कोतर्फ अस्पतालमा भर्ना भएका संक्रमितहरुको हृदयाघातबाट मृत्यु हुने संख्यामा २/३ गुणा वृद्धि भयो ।

विश्वविद्यालयका पीएचडी स्कलर र यो अध्ययन टिमका सदस्य पेद्रम सुल्तानियनका अनुसार अध्ययनले कोरोना संक्रमण र हृदयाघात घातक भएको प्रस्ट देखाउँछ ।

जब शोधकर्ताहरुले महामारीअघिका मुटु सम्बन्धी बिरामीहरुको तुलना महामारीपछिका मुटुका बिरामीहरुसँग गरे, निकै आश्चर्यजनक नतिजा आए । कोरोना संक्रमित भएपछि हृदयाघातबाट ज्यान जानेको संख्यामा ३ गुणा वृद्धि भएको थियो ।

कोरोना संक्रमित पुरुषहरुको हृदयाघातबाट मृत्यु हुने संख्या ४/५ गुणा वृद्धि भएको थियो जबकि महिलाहरुको संख्या ९ गुणाले बढेको थियो ।