एजेन्सी । उडिरहेको एउटा जहाजको इन्जिनमा आगो लागेपछि अमेरिकी जहाज निर्माता कम्पनी बोइङका ७७७ मोडलका जहाज अमेरिका र जापानमा ग्राउन्डेड भएका छन् । अमेरिकाको संघीय उड्ययन प्राधिकरणले निर्देशिका जारी गर्दै बोइङ ७७७ जहाजको उडानअघि थप सुपरीवेक्षण गर्नुपर्ने बताएको छ ।

शनिबार डेनभरमा एउटा जहाजको इन्जिन फेल भएको युनाइटेड एयरलाइन्सले आफूसँग भएका २४ वटा बोइङ ७७७ जहाज तत्कालका लागि ग्राउन्डेड गरेको जनाएको छ । डेनभरबाट होनोलुलुका लागि उडेको युनाइटेड एयरलाइन्सको बोइङ ७७७-२०० जहाजको एउटा इन्जिनमा शनिबार आगो लागेको थियो ।

जहाजबाट टुक्राहरू खसे पनि पाइलटले नआत्तिकन उक्त जहाजलाई ल्यान्ड गराएका थिए । अमेरिकासँगै जापानमा पनि बोइङ ७७७ जहाज ग्राउन्डेड भएका छन् । जापानको उड्ययन नियामकले जापान एयरलाइन्स र निम्पोन एयरलाइन्सलाई ती जहाज नउडाउन भनेको छ । दुबै कम्पनीसँग ३२ वटा बोइङ ७७७ जहाज छन् ।

जापानको पारवहन मन्त्रालयले गत डिसेम्बर ४ मा नाहाबाट टोकियो गइरहेको यही मोडलको जहाज इन्जिनमा समस्या आएपछि फर्किएको बताएको छ । जहाज निर्माता कम्पनी बोइङले आफ्ना प्राविधिकहरूले अमेरिकाको राष्ट्रिय पारवहन सुरक्षा बोर्डको अनुसन्धानमा सहयोग गरिरहेको जनाएको छ । डेनभर घटनाले बोइङको व्यापारमा फेरि धक्का लाग्ने भएको छ ।

यसअघि उक्त कम्पनीका बोइङ ७३७ म्याक्स जहाज लगातार दुइटा दुर्घटनामा परेपछि संसारभरि ग्राउन्डेड भएका थिए । अहिले युरोप र अमेरिकाका नियामकबाट उक्त मोडलका जहाज फेरि उडाउने अनुमति पाउन लागेको बोइङलाई ७७७ मोडलका जहाज ग्राउन्डेड हुन थालेपछि नयाँ चुनौती थपिएको छ ।